ക്രിസ്തു  വെളുത്തവൻ ആണത്രേ 

കുരിശിൽ  മരുച്ചൂടിൻ്റെ വെയിലേറ്റു വാടുമ്പോ
അവൻ്റെ  നിറം  കരിവാളിച്ചിരുന്നു..

കുരിശു യാത്രയിൽ അടിവേര് തകർന്നപ്പോഴും
അവൻ്റെ  നിറം കരിവാളിച്ചിരുന്നു..

പക്ഷെ

ചിലർക്ക്
ചിലർക്ക്  മാത്രം
ക്രിസ്തു  വെളുത്തവൻ  ആണത്രേ

പ്രണയത്തിനു  ജാതി പറഞ്ഞു വകഞ്ഞു മാറുമ്പോഴും
അവൻ്റെ നിറം കരിവാളിച്ചിരുന്നു..

പ്രണയിച്ചതിനു നിലയില്ലാ കയത്തിൽ മുക്കുമ്പോഴും
അവൻ്റെ  നിറം കരിവാളിച്ചിരുന്നു..

പക്ഷെ

ചിലർക്ക്
ചിലർക്ക്  മാത്രം
ക്രിസ്തു  വെളുത്തവൻ ആണത്രേ

അതെ  അവൻ്റെ  നിറം  വെളുപ്പാണ്

ചൂടേറ്റു  വീഴുന്ന കർഷകന്റെ കണ്ണീർകണങ്ങളിൽ
അവൻ്റെ  നിറം  വെളുപ്പാണ്..

ജാതിയുടെ  അതിർവരമ്പിൽ  ഭ്രഷ്ടാക്കപെട്ടവൻ്റെ  കണ്ണീർകണങ്ങളിൽ
അവൻ്റെ നിറം  വെളുപ്പാണ്..

പകലന്തിയോളം  വിയർക്കുന്ന  അമ്മയുടെ  കണ്ണീർകണങ്ങളിൽ
അവൻ്റെ  നിറം  വെളുപ്പാണ്..

പക്ഷെ

ചിലർക്ക്
ചിലർക്ക്  മാത്രം
ക്രിസ്തു  വെളുത്തവൻ  ആണത്രേ

ആ  ചിലരുടെ  കൂട്ടത്തിൽ
ക്രിസ്തുവിനെ  കണ്ടവരുണ്ടോ
കാണാൻ  വഴിയില്ല

കാരണം  അവനെ  അവർ  ഒരു  പുഴയിൽ  മുക്കി  കൊന്നു!!!!


-പ്രണാമം കെവിൻ-
-30 മെയ് 2018

സന്തോഷ് സെബാസ്റ്റ്യൻ മറ്റത്തിൽ